მარნეულის #7 საჯარო სკოლაში მცირე გრანტის პროექტის "ბიბლიოთეკა ჩვენი საგანძურია" მიმდინარეობა

14 დეკემბერს მარნეულის #7 საჯარო სკოლაში, მცირე საგრანტო პროექტის "ბიბლიოთეკა დიდი საგანძურია" ფარგლებში, მოეწყო ღონისძიება, რომელსაც დაესწრო III-IX კლასების მოსწავლეები, პედაგოგები, მშობლები, აღმამედლოს საჯარო სკოლის ქართული ენის მასწავლებლები და სიქას წარმომადგენელი.

თავდაპირველად პროექტის ხელმძღვანელმა მირანდა ლაბაძემ მოაწყო პრეზენტაცია პროექტის ეტაპების შესახებ. აზერბაიჯანულ ენაზე ღონისძიებას უძღვებოდა სამოქალაქო განათლების პედაგოგი მინარა კარაკოვა.

შემდეგ მოწვეულმა სტუმარმა მილანა რამაზანოვამ, რომელიც ხელნაწერთა მუზეუმის მიერ მოწყობილი ხელნაწერთა კონკურსის გამარჯვებულია, მოსწავლეებს კალიგრაფიული წერის მასტერკლასი ჩაუტარა. ღონისძიებაზე ასევე მოეწყო საჯარო კითხვა. პროექტის ფარგლებში სკოლის ბიბლიოთეკისთვის შეძენილი წიგნებიდან ქართულ და აზერბაიჯანულ ენაზე წაიკითხეს ვაჟა-ფშაველას ლექსები. მოსწავლებს დაინტერესდნენ ახალი წიგნებით და მათი წაკითხვის სურვილი გამოთქვეს.

დასასრულს მოსწავლეებმა წაიკითხეს ქართული ლექსები და იმღერეს "სულიკო". 

მე-აქტიური მოქალაქე

2012 წლის 13 დეკემბერს მარნეულის #8 საჯარო სკოლაში სამოქალაქო კლუბის წევრებმა „ჩემები“, სტუმრად მოიწვიეს აზერბაიჯანელი სტუმარი ზაურ ხალილოვი, რომელიც პროფესიით ეკონომისტია და არასამთავრობო ორგანიზაცია "სამოქალაქო ინტეგრაციის ფონდის" ხელმძღვანელია.

დღის თემა გახლდათ „მე -აქტიური მოქალაქე“. ბატონმა ზაურმა პირველ რიგში მოუთხრო კლუბის წევრებს თავისი ისტორია, თუ როგორ გახდა პროფესიონალი თავის სფეროში და როგორ მიაღწია წარმატებას. შემდეგ მოსწავლეებს რამდენიმე საჭირო რეკომენდაცია მისცა და უპასუხა მათ შეკითხვებს. შეხვედრა ორ ენაზე მიმდინარეობდა-ქართულად და აზერბაიჯანულად. სტუმართან საუბარი გაგრძელდა 2,5 საათი, რადგანაც მონაწლეები დიდი ინტერესით ჩაერთვნენ ბ-ნ ზაურთან დიალოგში.

შეხვედრის შემდეგ, ბ-მა ზაურმა მოსწავლეებთან ერთად დაათვალიერა ქართული ენის კაბინეტი. გადაიღეს სამახსოვრო ფოტოები. 

ბ-მა ზაურმა კლუბის მონაწილეებს, აქტიურობის შემთხვევაში, თავისი ორგანიზაციის მხრიდან, მხარდაჭერაც  დაპირდა .

ლიტერატურული საღამო მარნეულის #8 საჯარო სკოლაში

11 დეკემბერს მარნეულის #8 საჯარო სკოლის სამოქალაქო კლუბი „ჩემები“-ს ინიცირებით, მოეწყო ლიტერატურული საღამო. ღონისძიება ჩატარდა სკოლის ქართული ენის კაბინეტში, რომელიც PH international-ის საგრანტო კონკურსში გამარჯვების შედეგად გაკეთდა.

მოსწავლეებმა წაიკითხეს ვაჟა-ფშაველას პოემა „ალუდა ქეთელაური“ და გამართეს დისკუსია თემაზე - „თემის გავლენა ადამინის ცხოვრებაში“. მონაწილეებისგან წამოვიდა სხვადასხვა ვერსია, თუმცა საბოლოოდ ყველა მათგანი მივიდა იმ დასკვნამდე, რომ ტრადიციების პატივისცემა ძალიან კარგია, თუმცა არსებობს ზოგიერთი ისეთი წესი, რომელიც არ უნდა გადაეცეს თაობებს.

დისკუსიის შემდეგ, კლუბის წევრები ჩაერთვნენ აქტივობაში, რომელიც სტერეოტიპების მსხვრევისკენ, „ყუთს გარეთ“ აზროვნების განვითარებისკენ იყო მიმართული.

ლიტერეტურულ საღამოს ესწრებოდა 2 ქართული ენის პედაგოგი და სიქა-საგანმანათლებლო ინიციატივების ქართული ასოციაცია.

ამ სახის ლიტერატურული ღონისძიება იყო პირველი შემთხვევა მრავალი წლის შემდეგ.

შიდსთან ბრძოლის დღე მარნეულის #3 საჯარო სკოლაში

შიდსთან ბრძოლის დღე მარნეულის #3 საჯარო სკოლაში  ღონისძიებით აღნიშნეს. კლუბ "ნათელი მომავლის" წევრებმა დაამზადეს პოსტერების შიდსის თემაზე. ჩატარდა სემინარი შიდსის თემაზე, სადაც მიმოიხილეს მისი წარმოშობის ისტორია და ისაუბრეს აივ ინფექციის გავრცელების გზებზე. 

სემინარს დაესწრო მე-9-12 კლასების 20 მოსწავლე. 

სემინარის დასასრულს ნაჩვენები იქნა მოკლემეტრაჟიანი ფილმი "სტიგმა", რომლის შემდეგ მოეწყო დისკუსია.   მოსწავლეები აქტიურად ჩაერთვნენ ფილმის გარჩევაში. ღონისძიების დამსწრე მოსწავლეები უფრო ინფორმირებულნი გახდნენ ამ დაავადებისა და მისი გავრცელების გზების შესახებ, გაიგეს თავდაცვის რა საშუალებები არსებობს, შეიტყვეს, როგორი თანადგომა შეუძლიათ გაუწიონ აივ ინფიცირებულ ადამიანებს და რომ შეუძლიათ იმეგობრონ მათთან.

შიდსთან ბრძოლის დღისადმი მიძღვნილი ღონისძიება

1 დეკემბერს მარნეულის #8 საჯარო სკოლის სამოქალაქო კლუბის "ჩემები" ინიციატივით მოეწყო შიდსთან ბრძოლის დღისადმი მიძღვნილი ღონისძიება. აღნიშნული ღონისძიება გაიმართა მარნეულის დემოკრატიული ჩართულობის ცენტრში. კლუბის წევრების მოწვევით, შეხვედრაში მონაწილეობას იღებდნენ მარნეულის #1 და #7 საჯარო სკოლების მოსწავლეებიც.

თავდაპირველად, დამსწრე საზოგადოებამ მოისმინა სემინარი შიდსის შესახებ (ინფექციის განმარტება, გადადების გზები, რეკომენდაციები ინფიცირებულთათვის და სხვა). სემინარს უძღვებოდნენ სამოქალაქო განათლების პედაგოგი ნარგიზ ნაბიევა და დემოკრატიული ჩართულობის ცენტრის თანამშრომელი ზაურ დარგალი. სემინარის დასასრულს ნაჩვენები იქნა მოკლემეტრაჟიანიფილმი "სტიგმა", რომლის დამთავრების შემდეგ მოეწყო დისკუსია. მონაწილეები აქტიურად ჩაერთვნენ დისკუსიაში და დააფიქსირეს საკუთარი პოზიციები.

ტოლერანტობის დღისადმი მიძღვნილი ღონისძიება

ქ. მარნეულის  #8 საჯარო სკოლის სამოქალაქო კლუბმა „ჩემები“, 16 ნოემბერს  დემოკრატიული ჩართულობის ცენტრში გამართა ტოლერანტობის დღისადმი მიძღვნილი ღონისძიება. კლუბის წევრებმა ჩაატარეს მინი-სემინარი, რომელზეც ისაუბრეს ტოლერანტობის დეფინიციაზე, მის მნიშვნელობაზე და დამსწრე საზოგადოებას შესთავაზეს რამდენიმე რეკომენდაცია, თუ როგორ უნდა გახდეს საქართველოს თითოეული მოქალაქე უფრო მეტად შემწყნარებელი განსხვავებული ღირებულებების მიმართ. სემინარის შემდეგ ნაჩვენები იქნა ვიდეო  ნაწყვეტი  გადაცემიდან „აქტიური მოქალაქე“, რომელიც ამავე თემაზე იყო მიძღვნილი და მონაწილეობდა სამოქალაქო კლუბი „ჩემები“-ს წევრები.

ღონისძიებაზე იყო წარმოდგენილი კლუბის წევრების მიერ შესრულებული ნახატები ტოლერანტობის თემაზე. ღონისძიების დასასრულს, კლუბის წევრებმა ფორმატის ფურცელზე, რომელზეც ეწერა „მე ტოლერანტი ვარ“ ,  დახატეს ხელები და დააწერეს საკუთარი სახელები, იმის ნიშნად, რომ ისინი შემწყნარებლები არიან განსხვავებული ღირებულებების მიმართ.

ღონისძიება ერთ საათს გაგრძელდა, რომლის აქტივობებში კლუბის წევრები დიდი ინტერესით ჩაერთნენ.

საქართველოს დამოუკიდებლობის დღის აღნიშვნა მარნეულის სასკოლო სამოქალაქო კლუბების მიერ

ქ. მარნეულის №8 საჯარო სკოლის სამოქალაქო განათლების კლუბმა "ჩემები", №5 საჯარო სკოლის სამოქალაქო განათლების კლუბმა "ლელვარი"  და №3 საჯარო სკოლის სამოქალაქო განათლების კლუბმა "ნათელი მომავალი" 26 მაისი, საქართველოს დამოუკიდებლობის დღე, აღნიშნეს ერთობლივი ღონისძიებით. "ჩემები" სამოქალაქო განათლების კლუბის წევრებმა დაამზადეს ინფორმაციული სახის პლაკატები- "26 მაისი საქართველოს დამოუკიდებლობის დღეა", რომელიც 2 ენაზე ქართულად და აზერბაიჯანულად იყო წარმოდგებილი და მხატვრულად გაფორმებული. კლუბის წევრებმა ასევე  ფერადი ქაღალდებით დაამზადეს გადასაშლელი მისალოცი ბარათები ტექსტით- "გილოცავთ საქართველოს დამოუკიდებლობის დღეს 26 მაისს" და "მე <3 საქართველო" . კლუბის წევრებმა ბარათები დაურიგეს მარნეულის მოქალაქეებს და ამ ფორმითაც მიულოცეს დამოუკიდებლობის დღე.

   ღონისძიება დაიწყო მშვიდობიანი აქციით, რომელსაც ესწრებოდა №8 საჯარო სკოლის დირექტორი ელმან ჯაფარლი და რამოდენიმე პედაგოგი. მოწვეული იყო ადგილობრივი ტელევიზია, რომლის მეშვეობითაც კლუბის წევრებმა მარნეულის მოსახლეობას მიულოცეს დამოუკიდებლობის დღე.

   ღონისძიება გაგრძელდა მარნეულის დემოკრატიული ჩართულობის ცენტრში, სადაც №5 საჯარო სკოლის სამოქალაქო განათლების პედაგოგმა  26 მაისის იტორიული მიმოხილვა შემოგვთავაზა, რომელიც აზერბაიჯანულ ენაზე გადაითარგმნა ცენტრის თანამშრომლის ზაურ დარგალის დახმარებით. ისტორიული მოხსენების შემდეგ საღამო გაგრძელდა კითხვა-პასუხის რეჟიმში, რომელიც დასრულდა თითოეული წევრის მიერ გამოთქმული სურვილით, თუ როგორ საქართველოში სურდათ ცხოვრება. "მინდა საქართველო იყოს ერთიანი, მთლიანი, ძლიერი...შევიდეს ნატოში...ყოველთვის იყოს დამოუკიდებელი ..." და ა.შ.

   ღონისძიება დასრულდა მოკლემეტრაჟიანი დოკუმენტური ფილმის ჩვენებით "საქართველო 1918-1921 წლებში".

     კლუბის წევრებმა მიიღეს მნიშვნელოვანი ინფორმაცია 26 მაისთან დაკავშირებით და კმაყოფილები დარჩნენ ერთობლივი მუშაობით. 

ქ. მარნეულის #8 საჯარო აზრბაიჯანული სკოლის სამოქალაქო კლუბის წევრებმა ინიცირებული არჩევნები მოაწყვეს ქართულ ენაზე

24 მაისს მარნეულის დემოკრატიული ჩართულობის ცენტრში გაიმართა ქ. მარნეულის №8 აზერბაიჯანული სკოლის სამოქალაქო კლუბ  "ჩემების" მიერ ინიცირებული არჩევნების პროცესი. კლუბის წევრებმა გაინაწილეს საარჩევნო კომისიის წევრების, დამკვირვებლების და ამომრჩევლების ფუნქცია/მოვალეობები და მთელი პროცესი ქართულ ენაზე წარმოადგინეს. არჩევნების პროცესში მონაწილეობდნენ: ალი გარიბოვი- საარჩევნო კომისიის თავმჯდომარე, შამილ აზიზოვი-კომისიის თავმჯდომარის მოადგილე, რუსლან გარაბაღლი- მდივანი, I რეგისტრატორი- ნურადინ მუსტაფაევი, II რეგისტრატორი - ზუმრუდ ნაბიევა და  III რეგისტრატორი - რაუფ კარაევი, ყუთთან მდგომი კომისიის წევრი- ვუსალ დურსუნოვი, ნაკადის მარეგულირებელი - ილქინ ჰასანოვი, დამკვირვებელი- ორხან ჰასანოვი და წამყვანი- შაჰინ ახუნდოვი. ღონისძიება იყო დახურული და ესწრებოდნენ მხოლოდ დემოკრატიული ჩართულობის ცენტრის თანამშრომლები და კლუბის წევრები. 

   იმიტირებული არჩევნების გამართვა დიდი მნიშვნელობის იყო კლუბის თითოეული წევრისთვის, რადგანაც მათ პრაქტიკაში მოახდინეს იმ ცოდნის გადმოტანა და გათავისება, რაც თეორიულად უკვე შესწავლილი ჰქონდათ. ეს იყო კლუბის კიდევ ერთი აქტივობა, რომელიც  მოსწავლეებმა წარმატებით შეასრულეს და კიდევ უფრო მეტად გახდნენ კლუბის საქმიანობით დაინტერესებულები.

კლუბი "ნათელი მომავალი"

11 მაისს მარნეულის #3 საჯარო სკოლის სამოქალაქო კლუბმა "ნათელი მომავალი" სკოლის ეზოში მოაწყო შაბათობა, რომელშიც მონაწილეობა მიიღო კლუბის 15 წევრმა. მოსწავლეებმა კლუბის მეურვის ელიურა ალიევას ხელმძღვანელობით დაასუფთავეს სკოლის ტერიტორია და დარგეს ხეები.

სამუშაო შეხვედრები მარნეულის სასკოლო სამოქალაქო კლუბებთან

19 აპრილს სიქა-ს წარმომადგენლები "სამოქალაქო განათლებისა და პედაგოგთა გადამზადების პროგრამის" ფარგლებში ეწვივნენ პროგრამაში ჩართულ სკოლებს ქ.მარნეულში, კერძოდ მარნეულის #2, #3, #5, #7, #8 სკოლების დირექტორებს, სამოქალაქო განათლების პედაგოგებსა და კლუბის წევრებს. შეხვედრაზე საუბარი იყო პროგრამის მიმდინარეობის, სასკოლო სამოქალაქო კლუბების საქმიანობებისა და სამომავლო გეგმების შესახებ.

პროგრამის პრეზენტაცია მარნეულის მუნიციპალიტეტში

9 მარტს მარნეულის გამგეობის შენობის სააქტო დარბაზში გაიმართა "სამოქალაქო განათლებისა და პედაგოგთა გადამზადების პროგრამის" პრეზენტაცია, რომელსაც დაესწრო პროგრამაში ჩართული მარნეულის რაიონის სკოლების 53 წარმომადგენელი. შეხვედრა ქვემო ქართლის სამხარეო ადმინისტრაციის წარმომადგენლის ნინო ბასილაშვილის აქტიური მხარდაჭერით დაიგეგმა. შეხვედრას ესწრებოდა PH-International-ის გრანტების მენეჯერი თამუნა ფრუიძე. სკოლების წარმომადგენლები გაეცვნენ პროგრამის მიმართულებებს და პრიორიტეტებს, პრეზენტაციას რეგიონში პროგრამის მიმდინარეობის შესახებ.  დაბა კაზრეთის #1 საჯარო სკოლის მოსწავლეებმა და ამავე სკოლის სამოქალაქო განათლების პედაგოგმა ნინო ციმაკურიძემ მარნეულელებს გააცნეს კლუბ "საფიხვნოს" წარმატებული მუშაობის შედეგები, რომლის მიხედვითაც ის დასახელდა  "წლის საუკეთესო კლუბად", ხოლო პედაგოგი -"წლის საუკეთესო სამოქალაგო განათლების პედაგოგად". ასევე რუსთავის #25 საჯარო სკოლის სამოქალაქო კლუბის წევრებმა ისაუბრეს მათი კლუბის მიერ განხორციელებული საგრანტო პროექტის "ძმაო ძმითა ხარ ძლიერის" შესახებ. შეხვედრაზე ყურადღება გამახვილდა იმაზე, რომ პროგრამა ხელს უწყობს არამარტო მოსწავლეთა ცოდნისა და განწყობების ამაღლებას დემოკრატიული პრინციპების მიმართ, არამედ ამ პრინციპების გავრცელებას სკოლების მმართველობაში, პედაგოგებში, თავად მოსწავლეებში და ფართო საზოგადოებაში, რაც ქმნის ქვეყნის სამოქალაქო პროცესებში მოქალაქეთა კონსტრუქციული მონაწილეობის საფუძველს.