ჯანდარის საჯარო სკოლის სამოქალაქო კლუბის ინიციატივები

2013 წლის 10 მარტიდან 20 აპრილის ჩათვლით  ჯანდარის საჯარო სკოლის სამოქალაქო კლუბის ინიციატივით მოეწყო სკოლის ეზოს გამწვანების აქცია დევიზით „გიყვარდეს ბუნება“. კლუბის მეურვის ნაზირა ქარიმოვას ხელმძღვანელობით მე-9 და მე-10 კლასელებმა დარგეს ნერგები. კლუბის წევრები დიდ ყურადღებას აქცევენ სკოლაში სისუფთავის დაცვას. სკოლის ეზოს გალამაზების მიზნით მოსწავლეებმა საკუთარი ეზოებიდან მოიტანეს ყვავილის ნერგები და სკოლის ეზოში ყვავილნარი გააშენეს, რომელზე ზრუნვაც თავის თავზე აიღეს.

კლუბის მორიგი ინიციატივა იყო სკოლაში ბიოლოგიის კაბინეტის მოწყობა, რომელშიც მონაწილეობა მიიღეს მე-7, მე-9 და მე-10 კლასელებმა.

კლუბი აქტიურად განაგრძობს ინიციატივების შემუშავებას და განხორციელებას.

ტრენინგი თემაზე „ღონისძიების დაგეგმვა და ჩატარება“

10  ოქტომბერს,  მარნეულის დემოკრატიული ჩართულობის ცენტრში  გაიმართა ტრენინგი თემაზე „ღონისძიების დაგეგმვა და ჩატარება“. ტრენინგს დაესწრო მარნეულის #5 და #8 საჯარო სკოლის მოსწავლეები.

სამოქალაქო კლუბის წევრებმა მიიღეს ინფორმაცია, როგორ უნდა დაგეგმონ ეფექტური ღონისძიება, როგორ განახორციელონ იგი და რა რისკები არსებობს დაგეგმვის და წარმოდგენის დროს. თეორიული მასალის გაცნობის პროცესი ინტერაქტიულად წარიმართა, რომელშიც მონაწილეები სხვადასხვა კითხვებით და მაგალითებით აქტიურად ჩაერთვნენ.

ტრენინგის მეორე ნაწილი დაეთმო პრაქტიკულ მუშაობას. კერძოდ, მონაწილეებისგან შედგა  2 ჯგუფი. მათ დაგეგმეს უახლოესი სამოქალაქო დღესასწაულები - ტოლერანტობის დღის (16 ნოემბერი) და შიდსთან ბრძოლის დღის (1 დეკემბერი) 2 ღონისძიება, რომელსაც მარნეულის სხვა სკოლებთან ერთად ფართო მასშტაბიანი აუდიტორიისთვის ჩაატარებენ.

პრაქტიკული სამუშაოების შესრულებისას მონაწილეებმა წარმოადგინეს  საკმაოდ საინტერესო აქტივობები და მიიღეს  მათთვის მნიშვნელოვანი რეკომენდაციები. 

სამოქალაქო კლუბ "აქტიურების" მიერ ორგანიზებული ლაშქრობა გაგის ციხეზე

აღმამედლოს საჯარო სკოლის სამოქალაქო კლუბმა ,,აქტიურები" განაახლა საკლუბო მუშაობა. მათ დასახეს სამომავლო გეგმები და განახორციელეს პირველი აქტივობა 28.09.2013-ში - ლაშქრობა ისტორიულ ციხესიმაგრეზე - გაგის ციხეზე სოფელ კუშჩუში.

ლაშქრობას კლუბის წევრებმა გაუწიეს ორგანიზება, მოიპოვეს ინფორმაცია ციხის შესახებ, გააცნეს მოსწავლეებს,  დაათვალიერეს ციხის ნანგრევები და გადაიღეს სამახსოვრო სურათები ტექნიკის კონკურსის  ფარგლებში გადმოცემული ფოტოაპარატით.

კლუბის ამ ინიციატივის მიზანი იყო მოსწავლეებს უკეთ შეესწავლათ საკუთარი ქვეყნის ისტორია, ასევე განევითარებინათ ღონისძიებების დამოუკიდებლად დაგეგმვა-განხორციელების უნარები.

ამჟამად კლუბის წევრები მუშაობენ პროექტზე მცირე გრანტების კონკურსში მონაწილეობის მისაღებად. 

ერთი დღე ძეგვის შერეული ტიპის თავშესაფარში

2013 წლის 1 ივნისს, ბავშვთა დაცვის საერთაშორისო დღეს, ქ. მარნეულის N3 და N8 საჯარო სკოლების სამოქალაქო კლუბების „ნათელი მომავალი“ და  „ჩემები“ ინიციატივით, ძეგვის შერეული ტიპის თავშესაფარს გადაეცა საკვები პროდუქტები, ტანსაცმელი და სათამაშოები.

          სამოქალაქო კლუბებმა საკუთარ სკოლებში ორგანიზება გაუწიეს საკვები პროდუქტების, ტანსაცმლის და ა.შ. შეგროვებას და შეფუთვას. აქციაში ჩაერთო სკოლის მთელი კონტიგენტი: ადმინისტრაცია, მასწავლებლები, მოსწავლეები, მშობლები. ამის შემდეგ სამოქალაქო კლუბებმა მიმართეს ადგილობრივ თვითმართველობას რათა გამოეყო სატრანსპორტო საშუალება, შეგროვებული პროდუქტების დანიშნულების ადგილზე ჩასატანად. მუნიციპალიტეტმა თხოვნა დააკმაყოფილა, გამოიყი სამარშრუტო ტაქსი.

      1 ივნისს სამოქალაქო კლუბის წევრები ესტუმრნენ სოფელ ძეგვს. შერეული ტიპის თავშესაფარში იმყოფებიან: 9 ბავშვი(აქედან 5 სკოლამდელი ასაკის), მიტოვებული დედები, უნარშეზღუდული პირები, მოხუცები რომელთაც არ ჰყავთ მომვლელი. თავშესაფარს მეურვეობს ქალბატონი ნანა გოგოჭური, რომელიც ძალას არ იშურებს , თავს არ ზოგავს, რომ დაეხმაროს ამ ადამიანებს, თუმცა თავშესაფარს მაინც ძალიან უჭირს.

          კლუბებმა ამ ინიციატივით გამოხატეს ზრუნვა მათ მიმართ ვინც დახმარებას საჭიროებს.

გამწვანების აქცია მარნეულში

12 აპრილს მარნეულის #8 საჯარო სკოლის სამოქალაქო კლუბი „ჩემები“–ს წევრებმა საგრანტო პროექტის ფარგლებში „სუფთა გარემო“  მოაწყვეს გამწვანების აქცია. მონაწილეებმა მარნეულის კულტურის სახლის წინ მდებარე ცენტრალურ პარკში დარგეს ხეები.  „ჩემები“–ს წევრებმა წინასწარ შეიძინეს ნერგები თელავის  „ეკომარი“–სგან, რომლის ტრანსპორტირება მარნეულამდე უზრუნველყო მარნეულის შპს კომუნალურმა მეურნეობამ.  თვითმმართველობისგან წინასწარ იყო აღებული წერილობითი ნებართვა ადგილის შერჩევასთან დაკავშირებით. კლუბის წევრებმა მოამზადეს პლაკატები თემაზე – გავუფრთხილდეთ გარემოს. მონაწილეებმა მოიწვიეს მარნეულის #1 და #3 სკოლის მოსწავლეებიც, რომლებიც უშუალოდ იყვნენ ჩართულები გამწვანების აქციაში.

ნერგების დარგვის პროცესში მონაწილეობა მიიღეს მარნეულის გამგებელმა, ბატონმა პაატა აბრამიშვილმა, გამგებლის მოადგილემ, ბატონმა ჯონი შუბითიძემ და შპს კომუნალური მეურნეობის დირექტორმა ბატონმა ლერი მუმლაძემ. მათ გარდა, გამწვანების აქციაში  კლუბის წევრებს დაეხმარნენ  კომუნალური მეურნეობის სხვა წარმომადგენლებიც.

 „ჩემები“–ს კლუბს მოწვეული ყავდა ადგილობრივი ტელევიზია, რომელმაც გააშუქა ეს აქცია და უფრო ფართომასშტაბიანი გახადა.

სულ დაირგა 30 ძირი ხე კულტურის სახლის ეზოში, 5 ძირი სკოლის ეზოში ხოლო დანარჩენი 25 ძირი გადანაწილდა მოსახლეობაში, თხოვნის საფუძველზე.

სიუჟეტები იხილეთ შემდეგ ბმულებზე:

https://www.youtube.com/watch?v=wVermHpDRKQ

https://www.youtube.com/watch?v=FujZ8kket7g

9 აპრილის დღე

9 აპრილს მარნეულის #8 საჯარო სკოლის სამოქალაქო კლუბმა „ჩემები“და საქართველოს აზერბაიჯანული კულტურის ცენტრის წევრებმა ერთობლივი სამშვიდობო აქცია გამართეს. ღონისძიება ეძღვნებოდა 24 წლის წინანდელ საქართველოს თავისუფლებისთვის ბრძოლასთან დაკავშირებულ მოვლენებს. აქციის წევრებმა პატივი მიაგეს 9 აპრილს დაღუპულთა ხსოვნას და თბილისში, რუსთაველის პროსპექტზე მემორიალთან ყვავილები და პლაკატები მიიტანეს.

ამის შემდეგ მონაწილეები დაბრუნდნენ მარნეულში და „ათა ჰოლდინგის“ წინ საინფორმაციო სახის შეხვედრა გამართეს. მოწვეული იყო აზერბაიჯანელი სტუდენტები და მარნეულის სხვადასხვა სკოლის მოსწავლეები.

აქციაზე იმყოფებოდა აზერბაიჯანის 1 არხის ტელევიზია, რომელმაც სამოქალაქო კლუბის „ჩემების“ მეურვესთან ინტერვიუ ჩაწერეს დღის მნიშვნელობის შესახებ.

მარნეულის #8 სკოლის სამოქალაქო კლუბის ინიციატივა პანდუსების თაობაზე

8 აპრილს მარნეულის  #8  საჯარო სკოლის სამოქალაქო კლუბმა "ჩემები" ახალი ინიციატივით მიმართა  ქალაქის მუნიციპალიტეტს.  

მოსწავლეებმა მარნეულის გამგებლის ბატონ პაატა აბრამიშვილის სახელზე დაწერეს განცხადება, რომელშიც სთხოვეს, რომ ქალაქის სკოლების წინ კიბეებთან გაკეთდეს პანდუსები, რაც ხელს შეუწყობს შეზღუდული შესაძლებლობის მქონე ბავშვებისთვის ზოგადი განათლების მიღებას. 

 ამ მხრივ ნამდვილად დიდი პრობლემა დგას მარნეულის (და არა მხოლოდ მარნეულის) საჯარო სკოლებში. სპეც საჭიროების მქონე ბავშვები, რომლებიც საჭიროებენ ეტლით გადაადგილებას,  პანდუსების არარსებობის  გამო,  ვერ ახერხებენ სკოლაში სიარულს. საქართველოს კანონმდებლობის მიხედვით კი, ნებისმიერ ბავშვს აქვს უფლება მიიღოს  ზოგადი  განათლება.  

კლუბის წევრებს იმედი აქვთ, რომ  მარნეულის მუნიციპალიტეტი გაითვალისწინებს  კლუბის  ინიციატივას და ხელს შეუწყობს შეზღუდული შესაძლებლობის მქონე ბავშვებისთვის  განათლების  მიღებას და მათ საზოგადოებაში ინტეგრაციას.

ალგეთის #1 საჯარო სკოლის სამოქალაქო კლუბმა აღადგინა სკოლის ბაღი

ალგეთის #1 საჯარო სკოლის სამოქალაქო კლუბი "ახალგაზრდა ინიციატორები" კვლავ აგრძელებს აქტიურ მუშაობას სკოლისა და თემის სასარგებლოდ.

კლუბის წევრებმა გადაწყვიტეს აღედგინათ სკოლის ბაღი. ამისათვის თხოვნით მიმართეს სკოლის ადმინისტრაციას და თემს. ადგილობრივმა მაცხოვრებელმა აკიფ ჩოვდაროვმა თავისი სახსრებით შეიძინა ვაშლის, მსხლის, ალუბლისა და ხურმის ხის ნერგები. სკოლის ადმინისტრაციამ უზრუნველყო კლუბი სამუშაო იარაღებით.

15 მარტს კლუბის წევრებმა კლუბის მეურვის ალასკერ აქბეროვისა დახმარებით დარგეს აღნიშნული ნერგები და სკოლის ბაღზე ზრუნვას მომავალშიც გააგრძელებენ.

მარნეულის #8 სკოლის სამოქალაქო კლუბის მორიგი ინიციატივა

მარნეულის #8 საჯარო სკოლის სამოქალაქო კლუბის წევრებმა გამოკვეთეს პრობლემა: მარნეულის ბიბლიოთეკაში არ არსებობს ლიტერატურა, რომელსაც აზერბაიჯანულ ენაზე წაიკითხავენ მოსწავლე-ახალგაზრდები და გაიცნობენ ისეთ კლასიკოსებს, როგორიცაა ბალზაკი, შექსპირი, სტენდალი და ა.შ. აზერბაიჯანულ სკოლებში ქართული ენის სრულყოფილად შესწავლა ჯერ კიდევ ვერ ხერხდება, რის გამოც ახალგაზრდები რჩებიან მსოფლიო ლიტერატურის გაცნობის გარეშე.

მარნეულის #8 საჯარო სკოლის კლუბის "ჩემების" წევრებმა გადაწყვიტეს მარნეულის გამგეობას მიმართონ თხოვნით, მარნეულის ბიბლიოთეკაში შეიქმნას კუთხე, სადაც აზერბაიჯანულ ენაზე თარგმნილი მსოფლიო დონის მწერლების შემოქმედება იქნება განთავსებული. ამით მოსწავლე-ახალგაზრდობას მიეცემა საშუალება განვითარდნენ ამ კუთხით. 

13 მარტს კლუბის 5 წევრმა მარნეულის გამგეობის წერილობით მიმართა ამ პრობლემის მოსაგვარებლად.

ეკო დასუფთავება მარნეულში

მარნეულის #8 საჯარო სკოლის სამოქალაქო განათლების კლუბი „ჩემების“ ორგანიზებით, 28 თებერვალს მარნეულის „თუთის პარკში“ მოეწყო ეკო დასუფთავების აქცია.

 აქციაში მონაწილეობა მიიღო მარნეულის  #3 და #5 საჯარო სკოლის სამოქალაქო კლუბის წარმომადგენლებმაც. „ჩემები“-ს კლუბის  წევრებმა  ინიციატივით მიმართეს მარნეულის მუნიციპალიტეტს, რათა საჭირო რესურსებით მომხდარიყო აქციის უზრუნველყოფა. მუნიციპალიტეტმა აღნიშნული საქმიანობისთვის დახმარება სთხოვა მარნეულის შ.პ.ს. კომუნალურ მეურნეობას, რომელმაც გამოყო ნაგვის მანქანა და შეიძინა ნაგვის ცელოფნები და ხელთათმანები თითოეული მონაწილისთვის.

მოწვეული იყო  ადგილობრივი ტელევიზია, რომელმაც გააშუქა  დასუფთავების აქცია და მოამზადა სპეციალური რეპორტაჟი.

სულ მონაწილეობდა 40 მოსწავლე და 5 პედაგოგი განათლების და მეცნიერების სამინისტროს პროგრამიდან „ქართული ენა მომავალი წარმატებისთვის“.

ეკო დასუფთავების აქციამ ნაყოფიერად ჩაირა, მოსწავლეებმა სრულად დაასუფთავეს თუთის პარკის ტერიტორია და ტელევიზიის მეშვეობით ქართულ და აზერბაიჯანულ ენაზე, მოუწოდეს მოსახლეობას, რომ გარემოზე ზრუნვა და მსგავს ინიციატივებში მონაწილეობა ყველა მოქალაქის მოვალეობაა.

სამოქალაქო კლუბის "ჩემები" ინიციატივა

მარნეულის #8 საჯარო სკოლის წინ არ არსებობს არც შუქნიშანი და არც ფეხით მოსიარულეთა გადასასვლელი, ამიტომ მშობლებს და ბავშვებს ხანგრძლივი ლოდინი უწევთ გზაზე გადასასვლელად. უფროსკლასელები კი არ იცავენ ფეხით მოსიარულე მგზავრის მოძრაობის წესებს და ამით საფრთხეს უქმნიან მძღოლებს და საკუთარ თავსაც.
ამ პრობლემის მოსაგვარებლად მარნეულის #8 საჯარო სკოლის სამოქალაქო კლუბის "ჩემები"  მეურვე თეონა ბუაძე და კლუბის 3 წევრი 20 თებერვალს ეწვივნენ მარნეულის გამგეობას და კანცელარიაში ჩააბარეს წერილობითი მიმართვა მარნეულის გამგებლის მოვალეობის შემსრულებლის სახელზე ინიციატივით, სკოლის წინ გადასასვლელის მოწესრიგებასთან დაკავშირებით. 

ალგეთის #1 სკოლის სამოქალაქო კლუბის წევრების ინიციატივამ შედეგი გამოიღო - სკოლის წინ გზაზე მოძრაობის შემაფერხებელი სამი ბარიერი და საგზაო სარკე დამონტაჟდა

მარნეულის მუნიციპალიტეტის სოფელ ალგეთში #1 სკოლა საავტომობილო გზასთან ახლოს მდებარეობს.  გზებზე ავტომანქანების აქტიური და დიდი სისწრაფით მოძრაობა საფრთხეს უქმნიდა  სკოლის 440 -ზე მეტ მოსწავლეს . ხშირი იყო სკოლის წინ ავტო ავარიის შემთხვევებიც.

               ამ  პრობლმის მოგვარების მიზნით სკოლის სამოქალაქო კლუბის წევრებმა და სკოლის ადმინისტრაციამ თხოვნით მიმართა მარნეულის მუნიციპალიტეტის გამგეობასა და კომპანია „სოკარს“.  2013 წლის დასაწყისში სამოქალაქო კლუბის ინიციატივა დაკმაყოფილდა და კომპანია „სოკარმა“ სასწავლო პროცესის განახლებასთან ერთად მოსწავლეებს სკოლის წინ მოძრაობის შემაფერხებელი სამი ბარიერი დაახვედრა. გარდა ბარიერისა - სკოლასთან მკვეთრ მოსახვევში დამონტაჟდა გზის სარკეც, რაც ასევე მკვეთრად ამცირებს ავტოსაგზაო შემთხვევების რიცხვს.

             როგორც  სასკოლო სამოქალაქო  კლუბის ლიდერებმა ელმარ ომაროვმა და  დევრინ ბაირამოვმა განაცხადეს, ალგეთის #1 საჯარო სკოლის სამოქალაქო კლუბი აქტიურად განაგრძობს თემისა და სკოლის პრობლემების მოგვარებისათვის მუშაობას, ეძებს ადგილობრივ თვითმმართველობასთან და სხვადასხვა კომპანიებთან თანამშრომლობის გზებს.